Neysla innmatar hefur í seinni tíð dottið niður á Vesturlöndum, sérstaklega meðal yngra fólks. Það er miður, því lifur, nýru, hjörtu og önnur líffæri grasfóðraðs búsmala er einhver næringarefnríkasta fæða sem þú getur neytt.
Eins og ég hef skrifað áður og hægt er að lesa um betur annarsstaðar á vefsíðunni okkar, hefur innmatur algera sérstöðu hvað varðar næringarefnainnihald. Það má raunar kalla hann næringarsprengju, fulla af vítamínum, steinefnum, fitum, ensímum, próteinum, hjálparefnum ofl. og það sem meira er, öll þessi efni koma á auðupptakanlegu formi í innmat og í samvirkni hvert við annað. Almennt má segja að slíkur matur innihaldi á bilinu 10-100 sinnum meira magn næringarefna en vöðvar sama dýrs.
Hefðbundið mataræði forfeðra okkar innihélt mikið magn fituleysanlegra vítamína svo sem A og D. Þessi vítamín er aðeins að finna í dýrafitu – smjöri, svínafeiti, eggjarauðum, fiskiolíum og matvælum með fituríkum frumuhimnum eins og lifur og öðrum innmat. Þetta eru nákvæmlega þau matvæli sem hafa verið og eru enn sniðgengin af vesturlandabúum vegna ranghugmynda um óhollustu þeirra, byggða á þeirri trú að dýrafita og kólesteról séu slæm fyrir heilsuna. Eftir því sem fleiri rannsóknir eru gerðar á þessu sviði, komast æ fleiri sérfræðingar að þeirri niðurstöðu að ekkert gæti verið fjær sannleikanum!
Til viðbótar við hátt næringarinnihald, er í mörgum menningarheimum talið að neysla innmatar úr heilbrigðum dýrum styðji sambærileg líffæri neytandans. Þessi hugmynd þýðir í raun að besta eggjahvíta og önnur samverkandi næringarefni fyrir ákv.kirtil, líffæri eða vef fáist með því að neyta þessara tilteknu kirtla, líffæra eða vefja úr heilbrigðu dýri.
